![Од фабриката „Теslа“ во Германија украдени се дури 65.000 филџани за кафе Од фабриката „Теslа“ во Германија украдени се дури 65.000 филџани за кафе](https://avtoklub.mk/wp-content/uploads/2024/07/tesla-stolen-coffee-mugs-1-768x432.webp)
Кога менаџерот на фабриката на Tesla во Германија, Андре Тиериг излезе на говорницата на крајот од бурниот состанок со персоналот, тој не го спомна жестокиот конфликт меѓу работниот совет и моќниот синдикат IG Metall, кој дотогаш доминираше во дискусијата, според германскиот Handelsblatt.
„Ќе ви дадам само една бројка“, рече Aндре Тиериг (Аndre Thierig) на разглас во фабриката во близина на Берлин, во која работат околу 12.000 луѓе. „Од кога почнавме да произведуваме овде, купивме 65.000 шолји кафе. 65.000! Статистички гледано, секој од вас веќе има сет од пет домашни шолји за кафе IKEA – дома.
„Навистина ми е доста од одобрување нарачки за купување повеќе шолји за кафе“, низ смеа и аплауз рече тој, заканувајќи се дека нема да има прибор за јадење во просториите за одмор доколку не престанат кражбите, пренесуваат информативните агенции.
За тие „филџани“ Теsla платил 130.000 евра, односно 141.000 американски долари, што „испариле“ во ветер!
Дури и пред десетиците илјади украдени шолји и последните избори за работнички совети, фабриката на Теslа во Грунхајде, Бранденбург, беше во центарот на контроверзии. Речиси веднаш откако Германија ја победи конкуренцијата од осум други земји од ЕУ кои исто така ја сакаа првата европска фабрика на Теslа, почнаа да се натрупуваат критики за еколошката штета предизвикана од изградбата на фабриката. Ова вклучуваше расчистување на стотици хектари шума и загриженост за контаминација на подземните води.
Набргу по почетокот на производството во 2022 година, германското списание „Stern“ објави статија во која цитира сериозни прекршувања на прописите за безбедност и здравје на работниците, како и законите за заштита на животната средина. Извештајот покажа дека фабриката на Теslа забележала три пати повеќе итни случаи од фабриката на Аudi во градот Инголштад.
Во 2024 година, фабриката беше место на еколошки протести против планираното проширување на фабриката, кое конечно доби зелено светло по долга политичка борба. Неодамна, одлуката на извршниот директор на Tesla, Илон Маск (Elon Musk), да ги намали фабриките ширум светот за 10 отсто, резултираше со отпуштање на многу привремени и хонорарни работници и покрена прашања за тоа колку фабриката навистина ќе ја поттикне германската економија на долг рок.
Според секретарот на синдикатот IG Metall, Јанес Бојерт (Jannes Bojertu ), работниците на Tesla се соочуваат со екстремен притисок, вознемирување и фрустрација поради големиот број безбедносни несреќи во фабриката. Ова беше возвратено на состанокот на персоналот од Михаела Шмиц (Michaela Schmitz), неодамна реизбраниот шеф на Работничкиот совет, која верува дека синдикатот врши несоодветно влијание врз своите членови за да агитира меѓу работниците.