Совети за дезинфекција на возилата

Коронавирусот не е шега, па затоа почитувајте ги мерките за заштита, а од Макпетрол АД ви даваат неколку совети како да направите дезинфекција на вашето возило…

Дезинфекцијата е клучна за спречување на ширењето на коронавирусот. Како што редовно треба да ги миеме рацете и да ги чистиме површините во домот, така е неопходно да се врши дезинфекција и на вашето возило.

Секогаш е добро да се преземаат мерки за заштита, па затоа во продолжение следуваат неколку совети за чисто и безбедно возило.

Средствата за дезинфекција на домот се сосема доволни. Користете алкохолни марамчиња или, пак, вода, крпа и обичен сапун за чистење на цврстите пластични делови на кабината. Откако ќе завршите со внатрешноста на возилото, не заборавајте да ги исчистите надворешните рачки на вратите. За да не пропуштите и да не заборавите некој дел, најдобро е додека чистите да размислувате каде би можеле најчесто да завршат капките кои се исфрлаат при зборување, кивање или кашлање. Ако често се вртите лево-десно додека возите, тогаш освен воланот и предното стакло, убаво исчистете го и возачкиот прозорец и деловите околу него, како и централниот дел меѓу предните седишта.

Не брзајте и убаво исчистете ги сите копчиња, инструмент-таблата, радиото и уредот за навигација. Секако дека не треба да се заборават ниту воланот, менувачот и контролните механизми за вентилација. За сите електрични делови и копчиња најдобро е да користите марамчиња за дезинфекција или микрофибер крпа со средство на база на алкохол.

Не заборавајте на текстилот и меките површини на седиштата и вратите, но и на делот кај нозете. Истражете од каков материјал се изработени седиштата и подот и користете средство за чистење на таков материјал. Доколку немате услови за такво нешто, секогаш добро ќе завршат работа и марамчињата за дезинфекција.

Ако имате деца, тогаш размислувајте како деца. Особено внимавајте на задниот дел од предните седишта, прозорците и рачките на вратите, едноставно, сѐ што децата би можеле да допрат. Одвојте време и за чистење на прекривките, играчките или некои предмети кои децата ги чуваат во возилото.

Откако добро ќе го исчистите возилото, не заборавајте да го задржите во таква состојба што подолго време. Користете дезинфекциски средства или марамчиња на база на алкохол во возилото. Опремете се со гел за дезинфекција на база на алкохол, ракавици и маски и редовно по секоја употреба на возилото извршете дезинфекција на сите делови што биле на дофат на рацете.

Доколку запирате или излегувате од возилото секогаш користете ракавици, кои ќе ги отстраните од рацете пред да влезете во возилото. Избегнувајте да користите ракавици за повеќе употреби, бидејќи може да станат извор на вируси и бактерии.

 

Редакција МАКПЕТРОЛ ИНФО-ПОИНТ

ПОВРЗАНИ ВЕСТИ

PSA групацијата донира над 400.000 маски и друга медицинска опрема на болници во Европа

Polestar Percept нови детали и фотки – можна најава за електричниот SUV Polestar 3

Пресврт поради кризата се замрзнува, или забавува електрификацијата на возилата

Jaguar Land Rover против корона вирусот

Видео Црвено Ferrari што ви го одзема здивот и негова заштита од гребници

Иако пазарот запре, сета годишна продукција на овој модел е распродадена

Фудбалерите на Баерн не го фаворизираат Audi, клубот со драстични казни

Во Флорида во пожар изгореле над 3.500 автомобили

Составете си тркачка Toyota дома – во стилот седи дома