Golf „петката“ за многумина останува омилената варијанта на познатиот модел на Volkswagen
И додека кај нас моделите од гамата TDI беа најскапи а воедно и најбарани, остатокот од светот се восхитуваше на верзијата R32 со атмосферскиот 3.2 VR6 мотор. Тоа беше варијанта резервирана за најпребирливите корисници кои дефинитивно не размислуваа за потрошувачка на гориво при купување на Golf автомобил.
Изданието со ознака Golf R опстојуваше во понатамошните генерации, но со помал 2.0 TSI мотор. Сепак, како што пишува The Intercooler, во играта имало многу посериозни верзии. GTI W12-650 беше уникатен, но како што открива Маркос Маркес (Marcos Marques)за споменатиот магазин, Volkswagen подготви Golf со погон на сите тркала, придвижуван од V10 мотор.
Токму истиот мотор кој тогаш жубореше во Audi R8 и Lamborghini Gallardo. За разлика од споменатитe кај Golf, тој бил попречно монтиран напред, наведуваат специјализираните портали.
Тоа беше во време кога Volkswagen дури размислуваше да влезе во Формула 1 (како и денес). Моторот во Golf произведуваше околу 500 КС и вртеше до 8200 вртежи во минута. „Го видов и слушнав како работи неколку пати, и тоа беше прилично луд автомобил“, вели Маркес.
Екскурзиите на Volkswagen не застанаа тука. Така, во 2014 година на производствената линија пристигна Golf 7 со 2.0 TSI мотор и околу 400 КС. Погодувате, „Дизелгејт“ го прекина проектот R400.
Имаше и R420 со петцилиндричен на Audi, но и тој проект запре. Volkswagen сакаше да го инсталира истиот мотор на осмата генерација, но Audi се спротивстави – тоа би било канибализам против RS3.
