Модерните автомобили носат врвна технологија и врвна безбедност, но кога станува збор за поправки, сметките станаа астрономски. Еве зошто мало оштетување на фара ве тера да го смените целиот склоп.
Дали ви се случило сопственото возило да претрпи мали оштетувања, за подоцна во сервис да доживеете шок од цената? Во последно време, еден од најголемите шокови за возачите е замената на предните светла.
Според последните податоци од германската осигурувачка индустрија, трошоците за поправка или замена на предните фарви се зголемени за неверојатни суми во изминатите десет години. Ако некогаш замената на фар била релативно евтина интервенција, денес таа претставува сериозен удар врз семејниот буџет.
Зошто цените се зголемија тројно?
Главниот виновник за ова е напредната технологија. Денешните автомобили повеќе не користат обични халогени светилки кои лесно и евтино се менуваа во секој гаражен сервис. На нивно место дојдоа:
Сложени LED Matrix системи,
Адаптивни светла кои се прилагодуваат на сообраќајот,
Ласерски технологии и
Мноштво сензори, камери и електронски модули вградени директно во куќиштето.
Самите овие компоненти се извонредно скапи за производство, но тука се појавува уште еден клучен проблем.
Политиката на производителите: Нема поправка, само целосна замена
Најголемиот проблем лежи во тоа што производителите на автомобили сè поретко нудат модули или резервни делови за поединечни поправки. Доколку пукне само надворешното пластично стакло или се оштети едно ситно држач-крилце на фара, современиот систем бара замена на целиот склоп.
Експертите од осигурувачкиот сектор ова најдобро го споредуваат со ситуацијата „да го фрлите вашето скапо дизајнерско одело само затоа што ви недостига едно копче“.
Просечната цена на еден фар во изминатата деценија скокна од околу 700 евра на над 1.250 евра, додека кај одредени луксузни модели или електрични возила со врвни светлосни матрици, замената на само еден фар може да достигне вртоглави 6.700 евра.
Затоа, во време кога секоја грешка во сообраќајот или непредвиден камен на патот може да ве чини како половина половен автомобил, возачите се повеќе се принудени да размислуваат за дополнителни осигурувања кои ги покриваат овие штети.
