Германскиот производител BMW јавно го доведе во прашање најновиот технолошки пробив на кинескиот BYD, кој ветува речиси неверојатно брзо полнење на електрични автомобили – но, според BMW, тоа не доаѓа без цена.
BYD неодамна претстави таканаречено „flash charging“ решение со моќност до 1.500 kW, кое може да обезбеди и до 500 километри автономија за само пет минути.
Но од BMW предупредуваат дека ваквите бројки не ја кажуваат целата приказна. Според нивните инженери, кога се оптимизира еден параметар – како брзината на полнење – неизбежно се прават компромиси во други области.
Главните ризици што ги посочуваат се:
намалена долгорочна издржливост на батеријата
потенцијално помала енергетска густина (домет)
зголемени проблеми со прегревање и термален менаџмент
Од BMW велат дека и тие можат да постигнат повисоки брзини, но свесно избираат баланс меѓу брзина, сигурност и трајност. Нивните најнови електрични модели веќе поддржуваат полнење до околу 400 kW, што е доволно за стотици километри за околу 10 минути.
Дополнителен проблем е инфраструктурата – технологијата на BYD бара специјални мегаватни полначи, кои засега се ограничени на одредени пазари, додека BMW се фокусира на компатибилност со постоечките мрежи.
Овој судир меѓу BMW и BYD покажува дека трката во електричната мобилност не е само прашање на бројки, туку и на стратегија – дали е поважно максималната брзина или долгорочната сигурност.