Ауди официјално потврди дека новиот A2 e-tron ќе биде претставен во есента 2026 година како нов влезен електричен модел во понудата на германската марка. Со тоа легендарното име A2 се враќа по повеќе од две децении, но овојпат во целосно електрично издание.
Новиот модел ќе биде позициониран како компактен премиум EV наменет за градско и секојдневно користење, а Ауди најавува комбинација од ефикасност, практичност и модерна технологија. Производството ќе се одвива во Инголштад, Германија, каде веќе се подготвуваат линиите за новата генерација електрични модели.
Иако техничките детали сè уште не се официјално објавени, повеќе извори тврдат дека A2 e-tron ќе користи MEB+ платформа од Volkswagen Group, слична на онаа кај Volkswagen ID.3 и Cupra Born. Се очекуваат LFP батерии од новата генерација и подобрена ефикасност, со автономија што би можела да надмине 450 километри.
Audi веќе тестира камуфлирани прототипи во екстремни зимски услови во Шведска, како и во аеротунелот во Инголштад, каде инженерите работат на подобра аеродинамика и пониска потрошувачка на енергија. Компанијата посебно ја истакнува специфичната линија на покривот, која потсетува на оригиналниот A2 од почетокот на 2000-тите.
Новиот A2 e-tron треба да биде наследник на моделите A1 и Q2, кои постепено се повлекуваат од понудата. Audi со овој автомобил сака да привлече помлада публика и да понуди подостапен влез во светот на премиум електричните возила.
На Reddit и EV форумите веќе има позитивни реакции за враќањето на името A2, а многумина очекуваат моделот да стане директен ривал на BMW i1 и Mercedes CLA EV. Дел од фановите посебно го поздравуваат враќањето на компактно и аеродинамично Audi со фокус на ефикасност.