Volvo смета дека SUV моделите повеќе нема да бидат единствениот доминантен избор на пазарот и најавува можно враќање на караваните во наредните години. Извршниот директор на компанијата, Хокан Самуелсон, изјави дека автомобилската индустрија „можеби претерала со SUV трендот“ и дека постои простор за повторна популаризација на класичните каравани.
Според Volvo, една од главните причини е аеродинамиката. Караваните имаат пониска и поелегантна форма од SUV моделите, што значи помал отпор на воздухот и подобра ефикасност – особено важно кај електричните автомобили, каде секој километар автономија е важен.
Шведскиот бренд е еден од најпознатите производители на каравани во историјата на автомобилската индустрија. Моделите како V70, V90 и легендарната 240 Kombi со децении беа симбол за практичност, безбедност и семеен автомобил. Volvo V70 Volvo V90 Volvo 240
Иако Volvo постепено ги повлекува актуелните караван модели од одредени пазари, компанијата не ја исклучува можноста за нова генерација електрични каравани базирани на SPA3 платформата. Токму оваа архитектура овозможува пониска поставеност на батеријата и поголема флексибилност во дизајнот.
Самуелсон верува дека и помладите купувачи би можеле повторно да покажат интерес за караваните, особено како алтернатива на масовната SUV понуда. Според него, во следните пет до десет години Volvo нема да продава исклучиво SUV модели.
Во моментов караваните остануваат популарни главно во Европа, а особено во скандинавските земји, каде практичноста и ефикасноста сè уште имаат предност пред високата SUV форма.