Системот за ладење на моторот е еден од најважните делови на автомобилот, но многу возачи му обрнуваат внимание дури кога ќе се појави проблем. Со доаѓањето на високите летни температури, експертите советуваат навремена проверка на ладилниот систем за да се избегне прегревање на моторот и скапи поправки.
Првиот чекор е проверка на нивото на течноста за ладење (антифриз) во експанзионата посуда. Проверката секогаш треба да се прави кога моторот е ладен, а нивото треба да биде помеѓу ознаките MIN и MAX. Ако течноста постојано се намалува, тоа може да укажува на протекување во цревата, ладилникот, водната пумпа или дури проблем со заптивката на главата на моторот.
Важно е да се провери и изгледот на течноста. Таа треба да биде чиста, без талог, рѓа или масен слој. Замаглена или кафеава течност може да биде знак за сериозен проблем во системот.
Механичарите советуваат редовно да се контролираат и цревата, ремените, ладилникот и вентилаторот. Напукнати црева, неисправен термостат или нефункционален вентилатор можат брзо да доведат до прегревање, особено во градско возење и при работа на клима-уредот.
Дополнително, ладилникот треба да биде чист од прашина, инсекти и нечистотии за воздухот непречено да циркулира. Експертите потсетуваат и дека не треба да се користи обична вода наместо антифриз, бидејќи може да создаде каменец и корозија во системот.
Ако стрелката за температура почне да се приближува до црвената зона, автомобилот треба веднаш да се запре и моторот да се изгаси. Продолжување на возењето со прегреан мотор може да предизвика сериозни оштетувања и многу скапи поправки.