И покрај тоа што во првите девет месеци од 2026 година ширум светот се продадени 1,7 милиони возила, германскиот автомобилски гигант се соочува со сериозен пад на продажбата на кинескиот пазар, кој е ублажен со одличните резултати во Европа.
По неодамнешните разочарувачки извештаи од Audi, со слично соопштение се огласи и BMW. Во третиот квартал, вклучувајќи ги матичниот бренд, како и филијалите Mini и Rolls-Royce, компанијата глобално испорачала 551.072 возила, што претставува пад од 6,3 отсто во однос на истиот период лани.
Кина како главна точка на падот
Главниот причинител за општиот пад е сериозниот продор на домашните кинески брендови и зголемената конкуренција на тоа пазариште. На најголемиот светски пазар, BMW забележа пад од една четвртина, продавајќи 11.355 возила. Иако се соочуваат со предизвици, овие бројки сè уште се нешто поблаги во споредба со остриот пад кај конкурентите како Mercedes и Volkswagen групацијата.
Европа и САД носат оптимизам
Падот во Азија беше значително ублажен со силниот раст на европскиот пазар, каде продажбата скокна за импресивни 37,5 отсто (81.941 возило).
Кога станува збор за САД, BMW има сопствени погони на американска почва, што го прави поотпорен на евентуални царински бариери во споредба со компаниите кои автомобилите исклучиво ги извезуваат. Благодарение на тоа, продажбата во САД е зголемена за 2,5 отсто, достигнувајќи 106.741 единица.
– Успеавме да ја задржиме позицијата во Европа и САД, и покрај тешките пазарни услови. Продолжената силна побарувачка за нашите чисто електрични модели јасно покажува дека сме на добар пат, изјави директорот за продажба, Јохен Голер.
Во првите девет месеци од годинава, BMW испорача вкупно 1,7 милиони возила, што е за 4,9 отсто помалку во споредба со соодветниот период во 2025 година.
