Новиот извршен директор на Фиат, Арно Белони, отворено призна дека укинувањето на култниот модел Punto било голема грешка. Според најавите, овој симбол на европскиот B-сегмент повторно ќе се најде во понудата, но со сосема поинаков, современ дизајн и без ретро елементи.
Легендарниот Фиат Punto, кој ја одбележа авто-индустријата по своето деби во 1993 година како наследник на моделот Uno, се подготвува за триумфално враќање на пазарот. Иако низ трите генерации се произведуваше сè до 2018 година, кога беше повлечен без директен наследник, сегашниот врв на италијанскиот производител сфати дека празнината што ја остави позади себе е преголема за да се игнорира.
Повраток на стариот терен
Во неодамнешно интервју за француските медиуми за време на Саемот на автомобили во Париз, првиот човек на Фиат, Арно Белони, беше повеќе од јасен во врска со идните планови на компанијата:
„Марка како Фиат апсолутно мора да има Punto во својата понуда. По C-сегментот, на ред е B-сегментот. Напуштањето на овој пазар ѝ овозможи на конкуренцијата да доминира во Европа“, истакна Белони.
Според него, заминувањето на Punto, заедно со крајот на производството на Ford Fiesta и отсуството на нов Volkswagen Polo, му овозможи на конкурентскиот Renault Clio да оствари огромен комерцијален успех и практично сам да владее со пазарот. Време е Fiat да го врати својот изгубен терен.
Модерен дизајн наместо „ретро“ филозофија
За разлика од популарните модели како Фиат 500 или новата Grande Panda, кои играат на картата на носталгијата и ретро стилот, следниот Punto ќе тргне во сосема поинаков правец.
Белони нагласи дека новиот градски автомобил во B-сегментот ќе носи радикален и целосно современ дизајн, што ќе му овозможи комплетна слобода на изразување и различност во однос на остатокот од гамата на брендот. Се очекува врз основа на новиот модел да се развие и идниот спортски претставник со потпис на Abarth, со што ќе се пополни празнината создадена по згаснувањето на спортските изведби кај конкуренцијата.
Бензински, хибридни и Stellantis технологии
Клучната промена во новата стратегија се однесува на изборот на погон. За разлика од претходните најави кои беа фокусирани исклучиво на електрични изведби, новото раководство сака да понуди флексибилност со бензински и хибридни опции кои се сè уште најбарани во овој сегмент.
Благодарение на членството во семејството Stellantis, развојот нема да бара астрономски финансиски инвестиции. Наместо поедноставната платформа Smart Car која се користи за Grande Panda, новиот Punto најверојатно ќе ја користи проверената мулти-енергетска платформа CMP/eCMP, која веќе успешно ја користат многубројни градски автомобили и SUV модели на групацијата.
Кога го очекуваме на пазарот?
Иако точниот датум на премиера сè уште не е официјално соопштен, со оглед на амбициите да се фати чекор со водечките ривали на европскиот пазар, новиот Fiat Punto би можел да ја види светлината на денот пред крајот на оваа деценија.
Европските купувачи кои со години чекаа вистински, достапен и модерен градски автомобил со класичен шмек конечно имаат причина за оптимизам.
