Компанијата Toyota го претстави својот нов концепт – FT-Me, електрично микро-возило создадено за градски услови и секојдневно движење на кратки релации. Со должина помала од 2,5 метра, ова возило се вбројува во категоријата квадрицкли – мини автомобили кои во некои европски земји можат да ги возат лица стари само 14 години.
Оваа иновација има за цел да понуди пристапен, безбеден и еколошки начин на транспорт за младите и за сите кои бараат практично решение за густ градски сообраќај.
FT-Me е дизајниран со акцент на одржливост и иновативност. Покривот е опремен со соларни панели, кои овозможуваат дополнителни 20 до 30 километри автономија дневно, а каросеријата е направена од рециклирани материјали.
Возилото нуди 360-степенска видливост, целосна интеграција со паметен телефон, и модерен ентериер инспириран од минимализам и функционалност – токму она што му треба на младата генерација возачи.
Toyota планира сериско производство на FT-Me да започне кон крајот на 2026 година, а на европскиот пазар да се појави во текот на 2027 година.
Проектот е делумно финансиран од британската влада и претставува дел од пошироката стратегија за развој на зелена урбана мобилност.
Во моментов, македонското законодавство не ја препознава категоријата „квадрицкл“ како посебна класа на возила, што значи дека возење од 14-годишна возраст не е дозволено според постојните прописи.
За ваков тип возила би било потребно ново законско решение, кое би дефинирало технички стандарди и услови за возење, како и можност за специјална дозвола за млади возачи.
Сепак, со зголемениот интерес за електрични и компактни возила, не е исклучено дека во наредните години Македонија ќе ја следи европската пракса и ќе овозможи ваков тип микро-мобилност.
Со својот футуристички дизајн, ниска потрошувачка и еколошка ефикасност, Toyota FT-Me претставува симбол на новата ера на урбаниот транспорт.
Мал, тивок и паметен – можеби токму ваквите возила ќе станат секојдневие и на нашите улици во блиска иднина.