Изведбата Alpina претставува подобрена верзија на моделот XB7, кој ја носи ознаката Manufaktur…
Теренецот со високи перформанси доби нови тркала, повеќе кожа во внатрешноста и поширок избор на опции за персонализација за понудата во моделската 2025 година.
BMW Alpina XB7 е модел кој постои од 2020 година, но значително е ажуриран во 2022 година. Новиот XB7 Manufaktur за 2025 година е базиран на овој фејслифт, но носи и некои дополнителни функции за да го направи попривлечен за купувачите на луксузни теренци.
Надворешните промени се ограничени на нов сет од импресивните 23-инчни ковани тркала Alpina Classic со Aluminium Satin финиш и малку поизразен заден дифузор.
Каросеријата е достапна во Alpina Blue и Alpina Green II, а достапни се и други опции од каталогот BMW Individual.
Сите може да се комбинираат со опремата Black Line и со нивото на опременост Aluminum Satin Line, додавајќи црни или сјајни детали на надворешноста и внатрешноста.
BMW Alpina XB7 Manufaktur стандардно доаѓа со дополнителна кожа во внатрешноста, но опцијата за целосно кожена внатрешност на Lavala сепак привлекува најголемо внимание.
Ова бара повеќе од 100 часа рачна работа за да се исечат и шијат 427 парчиња кожа.
Тапацирот е достапен со која било завршница, а има ознаки на Manufaktur на патосниците и посебна плоча на централната конзола.
Под хаубата се наоѓа 4,4-литарски V8 твин-турбо мотор, кој развива моќност 457 kW/621 КС и 800 Nm максимален вртежен момент.
Силата се пренесува на сите четири тркала преку осумстепен автоматски менувач и системот xDrive на BMW, а теренецот е опремен и со електронски променлив заден диференцијал со ограничено лизгање.
Во споредба со стандардниот модел BMW X7, Alpina XB7 има спортско подесена воздушна суспензија која автоматски се спушта при поголеми брзини. Управувањето станува поостро, а за застанувањето се грижи систем за сопирање со високи перформанси со поголеми перфорирани дискови и сини клешти на сопирачките.
Alpinа досега има произведено 2.880 модели XB7, од кои 550 за европскиот пазар. Цената на моделот BMW Alpina XB7 Manufaktur (2025) во Германија е 190.500 евра, додека првите испораки, според очекувањата би требало да започнат во март следната 2025 година.