Наскоро, на производителите на автомобили ќе им биде многу тешко да ги постигнат поставените цели
Сигурно сте се запрашале во последно време зошто автомобилските компании присутни во Европа се опседнати со разни хибриди и електрични возила. Работата е, пред сè, што тие сакаат да се заштитат од високи казни поврзани со прекумерни емисии. За секој прекумерен грам CO2 во нивните возни паркови, производителите на автомобили плаќаат 95 евра.
Некој ќе рече, во ред, тоа не е толку кога ќе земеме во предвид дека имаме работа со такви гиганти (со длабоки џебови) како Volkswagen Group или Stellantis. Сепак, овие казни имаат тенденција да се акумулираат, бидејќи се применуваат на секој продаден автомобил. Во превод, станува збор за огромни суми кои се рефлектираат во стотици милиони евра, во случај продажбата на хибриди и електрични автомобили да не биде доволна за да се компензира продажбата на модели со конвенционален погон.
Ова е и една од причините што таканареченото „намалување“, односно намалувањето на работниот волумен и бројот на цилиндрите на моторот, стана правило во Европа, а не исклучок.
Ширењето на помали, електрифицирани погонски единици има глобално влијание, бидејќи Европа е еден од најважните региони за автомобилската индустрија. Производителите на автомобили мора да се прилагодат на строгите регулативи во ЕУ, а тоа влијае на развојот на нови автомобили и мотори.
Сегашната цел на емисиите на флотата од 115,1 g/km (врз основа на циклусот WLTP) ќе се намали за околу 19 проценти на 93,6 g/km во 2025 година, со што повеќето производители на автомобили се изложени на ризик.
Истражувањето спроведено од аналитичката компанија Dataforce укажува на загрижувачка иднина за многу компании кои продаваат возила во Европа. Во јуни 2024 година, само Tesla и Geely беа под просекот на флотата што ќе стапи на сила во 2025 година.
Според Европската комисија, секоја компанија има своја цел, пресметана врз основа на просечната тежина на нејзиниот возен парк. Со други зборови, компаниите кои продаваат повеќе теренци имаат повисоки цели од оние со претежно помали возила. Во 2020 година, производителите на автомобили платиле околу 510 милиони евра за неисполнување на целите поврзани со намалување на емисиите на јаглерод диоксид, а треба да се има предвид дека регулативата беше порелаксирана.