Porsche ќе го задржи Cayenne со мотор на внатрешно согорување на продажба дури и откако следната генерација на електричниот модел пристигне кон крајот на оваа деценија….
Автомобилот опремен со мотор на внатрешно согорување ќе се нуди до 2030-тите години.
Porschе ќе користи слична стратегија и за Panamera. Воведена претходно оваа година, третата генерација на Panamera има долг рок на траење пред себе. Во изјава за Autocar, шефот за истражување и развој на Porsche ги потврди плановите за целосно електрична Panamera. Мајкл Штајнер (Michael Steiner) изјави за британскиот магазин дека двојноста на моделот ќе го следи примерот на теренецот: „Новиот Cayenne е целосно електричен, но во текот на целиот негов животен век паралелно ќе имаме и верзија со мотор на внатрешно согорување. Истото важи и за Panamera“.
Со оглед на тоа што датумот на лансирање на електричната Panamera не е ни објавен, а моделот со мотор на внатрешно согорување ќе биде достапен во текот на целиот животен циклус на EV, автомобилот на бензин најверојатно ќе остане во продажба во следната деценија. Но, каде ќе се вклопи Panamera без мотор со внатрешно согорување во поставата на Porsche? Врз основа на претходната изјава на извршниот директор Оливер Блум (Oliver Blume), автомобилот би можел да биде над Taycan: „Мислам дека би можело да функционира [да ги има и двете електрични возила] бидејќи тие играат во различни сегменти. Panamera е еден чекор погоре од Taycan“.
Porschе веќе ја имплементира оваа стратегија со мотор на внатрешно согорување +EV со бензинските и електричните модели Macan. Crossover моделот со конвенционален погон ќе биде пензиониран во 2026 година. Во меѓувреме, тој веќе е укинат во Европа бидејќи повеќе не е во согласност со построгиот закон за сајбер безбедност што стапи на сила на почетокот на оваа 2024 година. Од истата причина, 718 Boxster и 718 Cayman веќе не се продаваат во ЕУ. Овие спортски автомобили остануваат достапни на други пазари, но и тие ќе бидат пензионирани во одреден момент во 2025 година за да се направи место за нивните електрични замени.
Porschе сè уште се надева дека ќе ја постигне својата цел, електричните возила да сочинуваат 80% од продажбата до 2030 година. Голем SUV со три реда седишта што доаѓа подоцна оваа деценија ќе биде чисто електричен. Сепак, компанијата е малку повнимателна во врска со усвојувањето на електрични возила сега кога сфати дека „оваа транзиција ќе се случи побавно на многу пазари“, вели Штајнер.
Тој, исто така, верува дека синтетичкото гориво може да помогне за време на оваа постепена транзиција од изведби со мотор на внатрешно согорување кон ЕV: „До крајот на деценијата, би можело да има значителен дел од е-горивата (e-fuels) во употреба. Можеме, малку по малку, галон по галон, да ги замениме фосилните горива со е-гориво“.
Сепак, Porsche сè уште не се откажува од развојот на мотори со внатрешно согорување. Штајнер рече дека дополнително ќе се инвестира во V6 и V8 за да се усогласат со построгите регулативи за емисии.
Porsche нема да додава симулирани менувања на брзините на своите електрични возила
Porsche изгледа не е заинтересиран да додаде дел од технологијата што ја имаат неговите ривали.
Иако голем број брендови лансираа спортски електрични возила во последните неколку години, Hyundai е меѓу оние кои успеаја да се истакнат благодарение на Ioniq 5 N. Постојат неколку причини за тоа, но меѓу најважните се разновидноста на режимите и поставки кои мора да додадат емоции и вклученост во возењето, вклучително и симулирани менувања на брзини.
Неодамна, додека разговараше со членовите на австралиските медиуми, шефот за развој на Porsche, Ларс Керн (Lars Kern), рече дека неговиот тим го возел Ioniq 5 N, но одлучил да не додава лажни менувања на брзините на своите електрични возила.
„Очигледно, гледаме што прави конкуренцијата, но нашата перспектива секогаш е зошто да направиме нешто полошо?“ изјави тој за списанието Drive. „Електричниот мотор е подобар од моторот со внатрешно согорување, па решивме дека нема причина да симулираме она што беше во минатото. Го погледнавме, но… Не гледам поента да го користам за да се чувствува како мотор со внатрешно согорување, бидејќи не е, па нема да го направиме. Не сакаме да лажираме мотор со внатрешно согорување бидејќи сè уште правиме мотори со внатрешно согорување, така што не ја гледаме поентата во сето тоа“, заклучил тој.