Љубителите на американските автомобили и рокенрол културата и оваа година ќе дојдат на свое. Фестивалот **Trash & Burn**, најголемиот собир на американски автомобили во Хрватска и еден од најпознатите во регионот, годинава го одбележува своето 18. издание. Настанот ќе се одржи на 12 и 13 јуни во излетничкиот комплекс Горичанец во Свети Мартин на Мури, во хрватскиот регион Меѓимурје.
Организаторите најавуваат доаѓање на стотици американски автомобили и мотоцикли од речиси цела Европа. Минатата година фестивалот угости околу 400 класични американски автомобили и исто толку мотоцикли, а годинава се очекува да бидат соборени нови рекорди.
Покрај автомобилите, Trash & Burn е познат и по својата уникатна ретро атмосфера. Посетителите ќе можат да уживаат во:
* рокабили и рокенрол концерти,
* pin-up девојки и бурлеска настапи,
* tattoo уметници,
* vintage штандови со облека и ретро предмети,
* саем на винилни плочи,
* burn-out шоу со американски автомобили.
Музичкиот дел од програмата ќе донесе настапи на рокенрол и рокабили бендови од Австрија, Германија, Италија, Унгарија, Словенија и Хрватска. Фестивалот традиционално привлекува илјадници посетители и претставува еден од најважните настани за љубителите на американската автомобилска култура во овој дел од Европа.
Историјата на Trash & Burn започна пред речиси две децении, а денес настанот важи за еден од најголемите и најстарите собири на американски автомобили во регионот. Благодарение на силната локална V8 сцена во Меѓимурје, фестивалот секоја година собира сопственици на легендарни модели како Chevrolet, Ford, Dodge, Pontiac и Cadillac.
Со комбинацијата од класични американски автомобили, рокенрол музика и ретро култура од педесеттите години, Trash & Burn и по 18 години останува еден од најатрактивните автомобилски фестивали во Југоисточна Европа.