Кинеските регулатори подготвуваат нов правилник со кој од 1. јануари 2027. година значајно ќе се ограничи употребата на целосно електрични скриени кваки на автомобилите. Главната цел на новите прописи е да се зголеми сигурноста, односно да се осигура дека вратите секогаш ќе можат да се отворат рачно, дури и во случај на целосен прекин на електричната енергија.
Што носат новите прописи?
Забрана за електрични кваки: Надворешните кваки кои за извлекување и отпуштање зависат исклучиво од електрична струја ќе бидат забранети за нови модели.
Правила за полускриените дизајни: Површинските или увлечените кваки сè уште ќе бидат дозволени, но под услов да имаат механичка функција за отворање и соодветен простор за фаќање (најмалку 60 x 20 милиметри) за да може вратата да се отвори рачно.
Враќање на физичките копчиња: Новите правила бараат и враќање на физичките прекинувачи за клучните функции како што се надворешните светла, бришачите и одмаглувањето на стаклата, со што овие опции се отстрануваат од дигиталните менија на екраните на допир.
Крајни рокови за производителите
Новите правила стапуваат на сила на почетокот на 2027 година за сите нови барања за одобрение на возила, додека производителите имаат рок до 1. јули 2027. година да поднесат дополнителна техничка документација и за моделите кои веќе се во продажба. Дополнително, иновативните дизајни ќе мора да поминат и низ ригорозни тестови за издржливост во реални услови на возење во должина од најмалку 30.000 километри.
