Анализата направена од француското издание L’Argus открива колку чинат батериите на електрифицираните модели на Dacia и на Renault…
Анализата открива дека Dacia Spring има најниска цена за kWh, додека хибридите возила пак, имаат највисоки цени на батериите и покрај нивниот мал капацитет.
Во последните неколку години, цените на батериите за електричните автомобили значително се намалија заедно со повисокото ниво на продажба на електрични автомобили.
Еден од факторите што придонесува за високата цена на батеријата е присуството на литиум за секој киловат-час (kWh), наведуваат новинските агенции.
Се очекува дека новиот хемиски состав на новите батерии дополнително ќе ги намали нивните цени.
Дотогаш, за сопствениците на електрични возила Renault и Dacia важат следните тарифи за kWh батерија.
За да провери колку чинат овие батерии, француското издание L’Argus ги анализираше батериите на електричните и хибридните модели на Dacia и Renault.
Така, во случајот со Dacia Spring, најевтиниот електричен модел во Европа, пост-продажната цена на неговата батерија од 26,8 kWh изнесува околу 7.000 евра.
Едноставна пресметка покажува дека цената на еден kWh за Dacia Spring е 261 евро, што е најниска цена во целата групација Renault.
Сепак, и оваа цена е речиси двојно поголема од просечната набавна цена, која е околу 150 евра за kWh кога се вградува во фабрика во ново возило.
Кај новото електрично Renault 5 цената за kWh е 280 евра.
Истата цена важи и за Megane E-Tech. Така, постпродажната цена на батериите за Renault 5 од 52 kWh чини 14.560 евра, односно 16.800 евра за Megane E-Tech за батерија со поголем капацитет од 60 kWh.
Електричниот модел со најскапа батерија е Renault Scenic E-Tech, со цена од 25.000 евра за верзијата со батерија од 87 kWh.
Што се однесува до хибридните модели на француската групација, цените на батериите се повисоки, дури 10 пати повисоки од цените на батериите за електричните модели, и покрај значително помалите капацитети.
На пример, батеријата во новиот Duster Hybrid чини вкупно 3.600 евра или 3.000 евра за kWh. Во овој случај, зборуваме за батерија со капацитет од само 1,2 kWh.
Истата цена важи и за хибридната верзија на Dacia Jogger.