Италијанскиот производител Ferrari повторно ги возбуди автомобилските фанови, откако во јавноста се појавија информации за нови модели и специјални верзии кои компанијата ги подготвува во следните години.
Според документите за заштита на трговски имиња, Ferrari веќе ги регистрирал ознаките F80 Roadster, F80 Targa, 12Cilindri GTO, 12Cilindri MM и неколку екстремни XX варијанти.
Најголемо внимание привлекува можниот F80 Roadster – отворена верзија на новиот Ferrari F80 хиперавтомобил, наследникот на LaFerrari. Според шпекулациите, Ferrari би можел да понуди и Targa изведба со отстранлив кров, наместо класичен Spider механизам.
Актуелниот Ferrari F80 користи хибриден V6 погон со дури 1.184 коњски сили и претставува најмоќниот сериски Ferrari досега. Производството е ограничено на само 799 примероци, а сите веќе се распродадени.
Покрај F80, Ferrari подготвува и уште поекстремна верзија на новиот V12 grand tourer – 12Cilindri GTO. Овој модел би требало да биде духовен наследник на легендарните 599 GTO, F12 tdf и 812 Competizione
Името GTO (Gran Turismo Omologato) има посебно место во историјата на Ferrari и традиционално се користи само за најексклузивните и најекстремните модели на брендот. Затоа многумина очекуваат 12Cilindri GTO да добие поагресивна аеродинамика, помала тежина и уште помоќен атмосферски V12 мотор.
Интересно е што Ferrari истовремено ги регистрирал и имињата F80XX и FXX80, што сугерира дека компанијата размислува и за екстремна track-only верзија на F80, наменета исклучиво за патека и за најбогатите колекционери.
Покрај тоа, протекоа информации и за нови верзии на моделот 296, вклучувајќи 296 Challenge Stradale и 296 CS, кои би требало да донесат уште порадикален карактер и подобри перформанси.
Иако Ferrari официјално сè уште не потврдил ниту еден од овие модели, регистрацијата на имињата вообичаено е прв сигнал дека компанијата веќе сериозно работи на нивниот развој.
За љубителите на Ferrari, ова значи едно – следните години би можеле да донесат некои од највозбудливите и најекстремните автомобили што некогаш излегле од Маранело.