Првиот електричен автомобил на Ferrari, чија цена ќе биде најмалку 500.000 евра, претставува важен чекор за италијанскиот производител на луксузни возила, изјави упатен извор за Reuters…
Ferrari во петок треба официјално да ја отвори новата производствена фабрика во Маранело на северот на Италија, што би можело да го зголеми производството во таа компанија за една третина, пишуваат деловните магазини.
Компанијата најави дека ќе го лансира електричниот автомобил на крајот на следната година, а планираната цена е знак дека Ferrari верува дека неговите клиенти ќе бидат подготвени да ја платат таа цена, иако пазарните конкуренти ја намалуваат цената на е-возилата поради слабеење на побарувачката.
Ривалската компанија Lamborghini планира да започне со продажба на своето прво електрично возило во 2028 година.
Минатата година Ferrari испорача помалку од 14.000 автомобили, а зголемувањето на производствениот капацитет треба да ја зголеми таа бројка на 20.000, храбар потег за компанијата, рече изворот, кој сакаше да остане анонимен.
„Постои зголемена побарувачка за Ferrari, и тие имаат простор да задоволат дел од таа побарувачка, без да се загрози ексклузивноста“, рече Фабио Калдато (Fabio Caldato), шеф на портфолиото во AcomeA SGR, компанија за управување со средства која поседува акции на Ferrari.
За да влезат во нивното Ferrari, возачите чекаат и до две години за одредени модели. „Да се биде на листата на чекање е статусен симбол само по себе“, додаде Калдато, посочувајќи дека постои зголемен интерес од богатите купувачи за пазарите во развој, како што се Индија и Блискиот Исток.
Вториот модел на електрично возило исто така е во развој, изјави изворот за информативната агенција Reuters, додавајќи дека процесот е во повој и дека компанијата можеби нема да сака да го зголеми вкупното производство на 20.000 возила годишно.
Аналитичарот на инвестициската банка на Медиобанка (Mediobanca), Андреа Балони (Andrea Balloni), очекува новото електрично возило на Ferrari да ја задржи високата цена како компензација за развојот на сосема нова електрична технологија и за аутсорсинг на повеќе делови.
„Очекувам новиот EV да биде нишан модел, со нешто повеќе од 10 отсто од годишната продажба“, рече Балони, нагласувајќи дека основниот клиент на Ferrari сè уште претпочита бензински модели.