Германскиот производител Volkswagen официјално го претстави својот нов голем SUV модел ID. Era 9X, развиен специјално за кинескиот пазар. Станува збор за луксузен електрифициран модел со продужена автономија (EREV), кој комбинира електричен погон со бензински „range extender“.
Со должина од над 5,2 метри и конфигурација со шест седишта (2+2+2), ID. Era 9X е позициониран во премиум сегментот на големи семејни SUV возила. Дизајнот е модерен и впечатлив, со масивна предна маска, тенки LED светла и динамични линии кои му даваат робусен, но елегантен изглед.
Во внатрешноста доминира технологијата. Кабината располага со два големи 15,6-инчни екрани за инфозабавниот систем, како и дополнителен 21,4-инчен екран поставен на таванот за патниците на задните седишта. Присутни се и панорамски стаклен покрив, амбиентално осветлување и врвни материјали, што создава чувство на дигитален луксузен салон.
Она што го издвојува моделот е погонот. ID. Era 9X користи 1.5-литарски бензински мотор кој служи како генератор и ја полни батеријата, додека тркалата ги придвижуваат електромотори. Ова решение овозможува значително зголемена автономија без целосна зависност од инфраструктурата за полнење.
Ќе бидат понудени повеќе верзии, вклучително и варијанта со два електромотори и погон на сите тркала, со моќност која достигнува околу 500 коњски сили. Вкупната автономија, со помош на бензинскиот генератор, може да надмине 1.000 километри, што го прави моделот особено практичен за долги патувања.
Со ID. Era 9X, Volkswagen јасно покажува дека сериозно смета на кинескиот пазар и на трендот на возила со продужена електрична автономија, сегмент кој таму бележи силен раст.