Автомобилските гиганти Stellantis и Jaguar Land Rover (JLR) официјално потврдија дека започнуваат стратешка соработка за заеднички развој на возила и технологии за американскиот пазар. Двете компании потпишаа меморандум за разбирање со кој ќе ги истражуваат можностите за заеднички проекти во САД.
Иако засега не се откриени конкретни модели, компаниите најавуваат дека ќе работат на „синергии“ во развојот на производи, технологии и евентуално производство. Според аналитичарите, ова може да значи заеднички платформи, споделување електрични технологии или дури производство на JLR модели во фабрики на Stellantis во Северна Америка.
За Jaguar Land Rover оваа соработка е особено важна бидејќи компанијата нема производствени капацитети во САД, а американскиот пазар е еден од најважните за моделите Defender и Range Rover. Дополнителен притисок претставуваат и новите американски царини, кои значително ги зголемија трошоците за увоз на возила.
Од друга страна, Stellantis има голема производствена мрежа во САД, но дел од фабриките работат со намален капацитет. Токму затоа партнерството може да донесе корист за двете страни – JLR би добил локално производство, а Stellantis подобро искористување на фабриките и нови премиум технологии.
Соработката доаѓа во период кога автомобилската индустрија сè повеќе се насочува кон партнерства за намалување на трошоците за развој на електрични и софтверски технологии. Stellantis веќе работи со кинеските Dongfeng и Leapmotor, додека JLR паралелно развива нови електрични модели и брендот Freelander за кинескиот пазар.
Иако договорот засега е во рана фаза, многумина го гледаат како едно од најизненадувачките автомобилски партнерства во последните години, особено поради можноста во иднина да се појават модели што ќе комбинираат технологии од Jeep, Range Rover и други брендови од двете групации.