Новиот електричен концепт на Ferrari предизвика лавина реакции на интернет, а многумина веднаш забележаа нешто необично – според нив, автомобилот премногу потсетува на новиот Nissan Leaf. Она што започна како шега на социјалните мрежи брзо прерасна во вирален феномен, а Nissan реши дополнително да ја искористи ситуацијата.
По бројните споредби меѓу двата автомобили, Nissan North America објави духовита порака на социјалните мрежи:
„Признаваме, поласкани сме.“
Објавата веднаш стана хит меѓу корисниците, а многумина ја пофалија маркетинг екипата на Nissan за брзата и забавна реакција. На Reddit, коментарите беа преполни со шеги дека Ferrari изгледа како „луксузна верзија на Leaf“ или дека некој „малку го растегнал Leaf и му ставил Ferrari лого“.
Причината за споредбите е новиот дизајнерски правец на Ferrari, кој кај електричниот концепт носи повисока каросерија, мазни линии и преден дел што на дел од јавноста навистина им наликува на новата генерација на Leaf.
Интернетот особено се забавува со фактот што станува збор за два автомобили од сосема различни светови. Од една страна е Ferrari со цена од неколку стотици илјади евра и ексклузивен имиџ, а од друга Nissan Leaf – еден од најпознатите масовни електрични автомобили во светот.
Сепак, дел од фановите на Ferrari сметаат дека споредбите се претерани и дека автомобилите немаат многу заедничко освен одредени дизајнерски елементи. Други, пак, велат дека ова покажува колку модерните електрични автомобили стануваат слични поради аеродинамичните барања и оптимизацијата на ефикасноста.
Без разлика дали навистина личи на Leaf или не, едно е сигурно – Nissan успеа да го украде шоуто со само една кратка реченица, а нивниот одговор стана речиси подеднакво вирален како и самиот нов Ferrari.
