Volkswagen го прикажа Polo во Бразил во нова Robust верзија, за која вели дека е „развиена и тестирана со клиенти во земјоделскиот сектор“…
Polo Robust треба да послужи како помала и попристапна опција во споредба со pick – up моделите Saveiro и Amarok.
Накратко, овој hatch – back се карактеризира со зголемено растојание од подлогата и голем број на опционални додатоци.
Polo Robust изгледа слично на стандардната Polo Track, но е малку повисок поради подигнатата предна и задна суспензија.
Ова подобрување му овозможува да се движи по терени со поголема побарувачка, како што се патишта со чакал, иако останува исклучиво со погон на предните тркала.
Возилото има и натпис „Robust“ на задната врата, 15-инчни челични тркала со црни капачиња, затемнети задни светла и поцврсти браници, кои веќе се вклучени во стандардната Polo Track.
Polo Robust се нуди со два опционални пакети за додатоци, што ја зголемува неговата практичност и отпорност на земјоделски средини.
Првиот пакет вклучува винилни навлаки за седишта, гумени патосници и заштитници на хаубата, кои компанијата ги препорачува особено за руралните области и фармите.
Вториот пакет се надоврзува на првиот, додавајќи гумен капак на багажникот и кука за влечење мали приколки или друга опрема.
Моторот е 1,0-литарски MPI flex со 62 kW/84 КС и 101 Nm максимален вртежен момент, поврзан со пет (5) степен мануелен менувач и погон на предните тркала.
Ознаката „флекс“ (flex) укажува на способноста да работи и на бензин и на етанол, алкохол што во Бразил е исклучително популарен кај возачите речиси подеднакво како и бензинот.