Од 2026 година, легендарниот германски бренд Alpina официјално ќе стане дел од BMW Group, означувајќи нова ера за еден од најексклузивните имиња во автомобилската индустрија. Досега Alpina функционираше како независен производител кој создаваше специјално доработени BMW модели, но отсега брендот ќе биде интегриран директно во структурата на BMW.
Оваа промена значи дека BMW ќе го преземе развојот, производството и глобалната дистрибуција на Alpina моделите, при што ќе се задржи препознатливата филозофија – комбинација од високи перформанси, луксуз и комфор, но без екстремниот спортски пристап карактеристичен за BMW M.
Alpina ќе се позиционира како ексклузивна под-марка, наменета за купувачи кои бараат врвна изработка, моќни мотори и префинето возачко искуство. Моделите ќе бидат поставени над стандардните BMW изведби, но под ултралуксузните автомобили на Rolls-Royce.
Иако сè уште нема официјална потврда за идните модели, се очекува новите BMW Alpina возила да се базираат на поголемите и поскапи серии, како лимузини и SUV модели, со посебен акцент на технологијата и ексклузивните материјали.
Со оваа одлука, BMW ја обезбедува иднината на Alpina брендот и ја претвора во официјален дел од своето портфолио, додека љубителите на марката можат да очекуваат континуитет на квалитетот и уште поголема глобална присутност.