Кинеските власти донесоа одлука да ги забранат таканаречените „yoke“ управувачи (управувачи со отсечен горен дел) во новите автомобили, повикувајќи се на безбедносни стандарди и заштита на патниците. Новите правила ќе стапат на сила од 2027 година и ќе важат за сите новохомологирани возила на кинескиот пазар.
Според регулаторите, проблемот со „јок“ дизајнот е во тоа што не обезбедува целосна кружна структура, што може да влијае на стабилноста при управување во итни ситуации, како и на ефикасноста на воздушните перничиња при судир. Новите стандарди бараат управувачот да исполнува строги критериуми за отпорност и апсорпција на сили од различни агли, што практично ги исклучува ваквите алтернативни форми.
„Јок“ управувачите станаа популарни кај одредени електрични модели во последните години, особено кај возила со напредни системи за управување „by-wire“. Сепак, дел од возачите изразуваа критики дека ваквиот дизајн е помалку практичен при маневрирање со ниски брзини и при паркирање.
Со оваа одлука, Кина испраќа јасна порака дека безбедноста има приоритет пред дизајнерските иновации. Производителите кои сакаат да продаваат возила на овој пазар ќе мора повторно да се вратат на класичниот кружен управувач или да развијат решенија што ќе ги исполнат новите регулативи.
Останува да се види дали и други пазари ќе го следат кинескиот пример или „јок“ управувачите ќе останат ограничени на одредени модели и региони.