Тарифите за кинеските возила би требало да бидат високи дури до 50 проценти, за европските производители да имаат шанса во острата битка со конкурентот од Далечниот исток…
Заканата за европската автомобилска индустрија е реална и за да ги заштити европските производители од агресивните (ниски) цени на кинеските марки, Европа ќе мора да подигне тарифен ѕид со оданочување на секој автомобил со 50%, според студијата на Rhodium Group. објави Financial Times.
Истрагата на Европската комисија започната во октомври може да доведе до зголемени царини за кинески возила (или возила произведени во Кина) увезени во Европа. Моментално тарифата е определена на 10%, ЕУ може да ја зголеми на 30%. Проблемот, според консултантската куќа, е што и со данок од 30 отсто, сепак би било исплатливо за многу кинески брендови да се продаваат во Европа, пренесуваат специјализираните портали.
– За да се направи европскиот пазар непривлечен за кинеските извозници на ЕV, веројатно ќе бидат потребни тарифи од 40% до 50%, уште повеќе за вертикално интегрираните производители како BYD – објаснува Rodhium.
BYD, на пример, моментално го продава новиот BYD Seal U за 20.000 евра во Кина и во просек 42.000 евра во Европа. Значи повеќе од двојно поскапо. Профитот на BYD, според проценката на консултантската куќа, изнесува 1.300 евра по автомобил во Кина и неверојатни 14.300 евра во Европа. Тоа е силен поттик за извоз во Европа. Со тарифи од 30%, BYD сепак би генерирал 4.700 евра профит по автомобил, според пресметките на Rhodium.
Водечкиот кинески производител на електрични автомобили контролира околу 95% од својот синџир на вредност, од рудници до производство на батерии, вклучувајќи ги системите за помош на возачот ADAS и софтверот за автомобили. Тоа е предност што, според Rhodium, може да овозможи дури и намалување на цените без губење пари во Европа, луксуз што не може секој да си го дозволи.