Иако актуелната генерација на Mazda Miata (MX-5) е присутна на пазарот повеќе од една деценија, интересот за овој легендарен roadster не само што не опаѓа, туку бележи и континуиран раст на продажбата. Во време кога SUV моделите доминираат, Miata останува доказ дека чистото уживање во возењето сè уште има своја публика.
Според достапните податоци, продажбата на Miata на клучните пазари повторно е во пораст, што е редок пример за модел со толку долг животен циклус. Причината за тоа лежи во уникатната формула – мала маса, заден погон, одлична распределба на тежината и директно управување, карактеристики што денес речиси и да немаат вистинска алтернатива.
Мазда со години ја доработува MX-5 без драстични промени, задржувајќи го препознатливиот карактер, но истовремено нудејќи модерни технологии и подобрувања во безбедноста и ефикасноста. Токму оваа конзистентност ја одржува довербата кај купувачите.
Иако се појавуваат шпекулации за идната генерација, актуелната Miata ќе остане во понудата уште неколку години. Mazda најавува дека и во иднина ќе ја зачува филозофијата на моделот, без оглед на електрификацијата и новите регулативи.
Успехот на Miata покажува дека емоцијата и возачкото искуство и понатаму можат да бидат поважни од трендовите, дури и во современата автомобилска индустрија.