![Италијанците го затворија европското производство на легендарниот Fiat 500 Италијанците го затворија европското производство на легендарниот Fiat 500](https://avtoklub.mk/wp-content/uploads/2024/05/fiat-500-768x512.jpg)
Тајно и со голема дискреција, познатиот Cinquecento веќе ја напушти производствената линија на полската фабрика Тиши (Tychy) Полска…
Fiat 500 со години е најпродаваниот модел на италијанската марка, па неговото заминување од Европа ќе биде многу болно, а преодниот рок до појава на наследник е многу тежок за италијанската марка.
По речиси две децении на пазарот, култниот Fiat 500 ја напушти Европа во својата модерна верзија, пренесуваат информативните агенции. Роковите за имплементација на новите безбедносни прописи кои стапуваат на сила во јули станаа прекратки за легендарниот Cinquecento да го окупира производниот погон на полската фабрика, што ќе му отстапи место на евтин кинески модел.
![](https://avtoklub.mk/wp-content/uploads/2024/05/Stellantis_500e_SOP_2024.jpg)
Со оглед на тоа што Fiat на почетокот на годината претстави специјално издание на 500 Collezione 1957, веќе можеше да се насети дека збогувањето е многу поблиску од очекуваното. Во најдобар случај, производството требаше да се протега до јули, но планот на Stellantis да ги вметне комплетите за склопување на малиот Leapmotor T03 во полската фабрика го забрза заминувањето на вечниот шармер на Fiat.
Stellantis нема време за чекање и сака да го има својот прифатлив модел на продажните маси во Европа.
Договорот со кинескиот партнер беше потпишан на крајот на минатата година, па Leapmotor сега и официјално е 15-та марка во групацијата Stellantis, а малиот и евтин модел T03 ќе биде првиот модел на азискиот партнер произведен на Стариот континент. Исчезнувањето на моделот 500 ќе биде голем проблем за италијанската марка, бидејќи значително ќе ја намали жетвата на Fiat во овој сегмент.
Иако 500 Electric останува во понудата, неговата продажба оваа година е толку слаба што не ја оправдува позицијата на наследник.
Fiat отсекогаш бил бренд со огромно искуство во развојот на мали автомобили, а моментално единствената надеж му е во успехот на новата Panda, која ќе биде претставена на почетокот на јули, но нема да се појави во продажба до крајот на годината.
Италијанците се во паника, бидејќи јазот меѓу исчезнувањето на нивната продажна „локомотива“ и доаѓањето на Pandа е преголем.
Сепак, менаџерите на Fiat потврдија дека работат на алтернатива, односно на развој на план за трансформирање на електричниот 500 во класична верзија. Во тој случај, Fiat ќе мора да вложи нови големи средства за ваква трансформација, бидејќи платформата на електричниот Fiat чинела 600 милиони евра.
Иако Италијанците наводно работат на наследник, бидејќи платформата на моделот на батерии технички овозможува продолжување на животниот век на новата генерација на Fiat 500 Hybrid во едицијата што се произведува во последните години, за жал таа нема да се појави дури во 2026 година.
Минатата година, Fiat испорача повеќе од 100.000 примероци од конвенционалните 500 низ цела Европа во модерно издание, што со оглед на непроменетата форма од 2007 година, е повеќе од респектабилен резултат. Во исто време, Fiat 500 со години е најпродаваниот модел на италијанската марка, а од дебито на првата генерација во 1957 година, ширум светот се продадени повеќе од седум милиони од познатиот Cinquecento.
Мала утеха за неговите фанови останува фактот што бензинскиот Fiat 500 продолжува да се произведува во Алжир, но за жал не и за европскиот пазар.