Автомобилите мора да имаат автоматско ограничување на брзината
Сите нови автомобили продадени во Европската унија за неколку недели (поточно од шести јули) ќе треба да бидат опремени со задолжителен „сопатник“ – систем „интелигентна помош за брзина“ (ISA).
Станува збор за автоматско ограничување на брзината, кое постојано ќе ја следи брзината на возачот во однос на поставените ограничувања на брзината, користејќи комбинација на GPS технологија и камери способни за препознавање сообраќајни знаци, потсетува RTL.
По надминување на дозволената брзина, возачот ќе добие звучен сигнал или предупредувачко светло кое го предупредува за прекршокот.
Доколку возачот ги игнорира предупредувањата, системот ISA може да преземе дополнителни мерки за да го принуди возилото да забави, од автоматско намалување на моќноста на возилото до зголемување на отпорот на педалата за гас. Сепак, возачот може да го отфрли системот со посилно притискање на педалата за гас или едноставно да го деактивира при палење на автомобилот.
Постојаното следење на системот потенцијално може да го зголеми стресот кај возачите, вели сообраќајниот психолог Жерар Тертолен за белгискиот 7sur7.
„Потребен е само краток момент на невнимание за малку да се надмине дозволената брзина. „Кога постојано ве потсетуваат на тоа, со звучен сигнал, тоа може да биде неверојатно иритирачко“, рече тој.
Европската унија нагласува дека примарна цел на овој систем е усогласување со планот „Визија нула“, кој има за цел да ги елиминира смртните случаи на патиштата во Европа до 2050 година.
Проценките покажуваат дека воведувањето на системот ISA може да го намали бројот на загинати на патиштата во ЕУ за 20%.