На стартот кога почна да го освојува пазарот на Стариот Континент Great Wall Motors појде со големи планови за својот бизнис во Европа…
Но, сега сите работници во Германија најверојатно ќе бидат отпуштени. Дали е ова само почеток на крајот?
Кинескиот производител на автомобили Great Wall Motors (GWM) сака да го затвори своето европско седиште во Минхен. Според германските медиуми, 100 вработени во GWM Europe биле погодени од овој потег.
За овој чекор се информирани работниците и деловните партнери. Целиот врвен менаџмент околу комерцијалниот директор на европската централа Штефен Кост (Steffen Cost) е отпуштен, јавуваат германските медиуми.
Сепак, затворањето на седиштето не треба да значи повлекување од Европа. GWM сака да ги задржи постоечките пазари, но во иднина ќе го контролира своето работење од Кина, пишува „Manager Magazin“.
Сепак, проширување на нови европски пазари засега повеќе не се планира.
GWM ги нуди своите електрични автомобили и plug-in хибриди во Германија, Велика Британија, Ирска, Шведска и Израел. Лансирањето на брендот во Австрија и Швајцарија беше планирано, но сега ќе биде ставено во мирување.
Според медиумите, партнерството со дилерот на автомобили Emil Frey Group ќе продолжи. Сега комуникацијата треба да се одвива директно со седиштето во Кина.
SUV/ crossover моделите се продаваат под марката Haval.
Компанијата имаше големи амбиции во Европа. До 2023 година во Минхен требаше да работат 300 луѓе.
Но, GWM сè уште беше далеку од тоа.
Со само 6.300 нови регистрации минатата година, групата не ги исполни зацртаните цели.